Иахьа имҩаԥысит Аԥсны Жәлар Реизара – Апарламент Аиҳабы Ашәба Лашеи УА Афедералтә Еизара Аҳәынҭқарратә Дума Ихьыԥшым Аҳәынҭқаррақәа Реиҩызареи, евразиатәи аинтеграциеи, аџьынџьуаа рымадареи русқәа рзы аилак ахантәаҩы актәи ихаҭыԥуаҩ Казбек Таисаеви реиԥылара.

Аиԥылара далахәын иара убас Аиҳабы ихаҭыԥуаҩ Ашот Миносиан.
Ашәба Лаша Казбек Таисаев аԥсшәа иаҳәо, иҭабуп ҳәа еиҳәеит аныҳәатә усмҩаԥгатәқәа рыҽрылахәразы Аԥсныҟа дахьааз Аԥсны жәлар рныҳәа ду рыцеиҩишарц азы.  

Казбек Таисаев, Лаша Ашәба УА Афедералтә Еизара Аҳәынҭқарратә Дума Ахантәаҩы Виачеслав Володин иҟнытә салам ииҭеит аныҳәагьы идиныҳәалеит.
  «Аԥсны – Анцәа иалихыз ҭыԥуп, иԥхоуп, ара асас изыԥшуп. Даҽазныкгьы иҭабуп ҳәа шәасҳәоит аныҳәахь сахьаашәыԥхьаз».

Апарламент Аиҳабы Аҳәынҭқарратә Дума Ахантәаҩы Виачеслав Володин иажәақәеи урыстәылатәи адепутатцәеи иҟарҵаз адныҳәалара иҭабуп ахиҳәааит.  
Аиԥылара иалахәыз ирҳәеит апарламентбжьаратә усеицура арӷәӷәареи аҿиареи аԥхьаҟагьы ргәы ишҭоу.
Аиԥылара ахыркәшамҭаз адепутатцәа агәаларшәагатә ҳамҭақәа еимырдеит.