Аҧсны Жәлар  Реизара - Апарламент  Аиҳабы Ашәба  Лаша Арҵаҩы имш азы адныҳәалара ҟаиҵеит.
Адныҳәалараҟны иҳәоуп:  
"Акыр иаҧсоу арҵаҩцәа! Аҧсны Жәлар  Реизара - Апарламент ахьӡала ишәыдысныҳәалоит шәзанааҭтә ныҳәа - Арҵаҩы имш!
Ахәыҷра ашықәсқәа раан ауаҩы иоуа адыррақәа аҵак ду рымоуп. Убри аҟнытә ҳара ҳзы арҵаҩы иџьабаа ахә дууп. Арҵаҩы изанааҭтәи иуаҩытәҩсатәи ҟазшьақәа ҳтәыла уаҵәтәи амш ашьақәгылараҟны ирыӡбо рацәоуп.
Ҳара ҳрызгәдууп 1992-1993 шш. Аҧсны Аџьынџьтәылатә еибашьраан абџьар кны  Ҳаҧсадгьыл ахьчаразы игылаз арҵаҩцәа.  Иҭабуп ҳәа раҳҳәоит апатриотцәа, иара убас аибашьра афырхацәа еиҵазааӡаз арҵаҩцәа.
Иҭабуп ҳәа шәаҳҳәоит ҧсахрада  шәзанааҭ иазыжәуа амаҵ азы, аибашьра ашьҭахьтәи ашықәс хьанҭақәа раан еиҧҟьарада  Аҧсны абиҧара ҿыцқәа рааӡара иазкыз аусура ахьымҩаҧыжәгоз.
Акыр иаҧсоу арҵаҩцәа, ишәзеиӷьасшьоит агәабзиара, еицакра зқәым агәамч, агәацҧыҳәара".