Имҩаԥысит Апарламенти Аԥсны Аҳәынҭқарра Аконтрольтә  палатеи реиԥылара
Иахьа Аԥсны Жәлар Реизара Апарламент Аиҳабы Лаша Ашәба Аԥсны Аҳәынҭқарра Аконтрольтә палата ахантәаҩы далархәны аиԥылара мҩаԥигеит. Аиԥылара иалахәын Апарламент Аиҳабы ихаҭыԥуаҩ Фазлыбеи Аҩӡба, Асҭамыр Аршба, Ашот Миносиан, Аконтрольтә палата ахантәаҩы ихаҭыԥуаҩ Зураб Оҭырба.

Аконтрольтә палата анапхгара аԥсшәа раҳәо, Лаша Ашәба иазгәеиҭеит Каха Пертаиа ахантәаҩы иаҳасабала данышьақәырӷәӷәаха инаркны фымз шыбжьысыз: «Абри аиԥылара мҩаԥгатәуп ҳәа иҳаԥхьаӡеит шәусураҟны иҟоу алҵшәақәа реилкааразы, ҳара, иара убас адепутатцәа ркорпус зҿлымҳара заҳҭо азҵаарақәа рзы иҟашәҵо аҭакқәа ҳаҳарц азы».

Аконтрольтә палата ахантәаҩы адырра ҟаиҵеит Аԥсны Аҳәынҭқарра Аконституциеи «Аԥсны Аҳәынҭқарра Аконтрольтә палатазы» Аԥсны Аҳәынҭқарра Азакәани иара убас Аконтрольтә палата 2023 шықәсазтәи аусура аплани инарықәыршәаны ишазԥхьагәаҭоу 18 контрольтә усмҩаԥгатә рымҩаԥгара. Иара убас уи иҳәеит хә-гәаҭарак ирыдҳәалоу 2022 шықәсаҟнытәи арахь ииасыз аконтрольтә усмҩаԥгатәқәа шыҟоу: АА Аекономика аминистрреи уи иаҵанакуа аиҿкаарақәеи, Ареспубликатә унитартә наплакы «Аԥснытәи аҳәынҭқарратә былтәы еилахәыра», Риҵатәи арелиқттә милаҭтә парк, Тҟәарчал араиони Аҟәа ақалақьи радминистрациақәа:
«Ииасыз агәаҭарақәа рзы аматериалқәа рыхәҭак Аԥсны Аҳәынҭқарра Апрокуратура хадахь идәықәҵан. Аха макьана имҩаԥгоу аусуреи ирыдыркылаз аӡбамҭақәеи рылҵшәақәа ҳмоуӡац», - иаҵшьны иҳәеит К. Пертаиа.
Аиԥылара алахәцәа ирҳәеит азҵаарақәа зегьы инарымаданы аусеицура ишазхиоу Аԥсны Жәлар Реизареи Аԥсны Аҳәынҭқарра Аконтрольтә палатеи русеицура шырӷәӷәатәу азгәаҭаны.