Абҵарамза 12 рзы Измит ақалақь аҟны (Ҭырқәтәыла) имҩаԥысит Аԥсуа культуратә центрқәа рфедерациа VIII реизара ду. Уи иалахәын Аԥсны Жәлар Реизара – апарламент аделегациа.

Аделегациа аилазаараҟны иҟоуп: Венори Бебиа– Акультуреи, аҿар русқәеи аспорти рзы аилак ахантәаҩы, Баҭал Џьопуа – Асоциалтә политикеи, аџьеи, агәабзиарахьчареи, адемографиеи, аибашьра аветеранцәеи аинвалидцәеи русқәа рзы аилак ахантәаҩы ихаҭыԥуаҩ, Инар Гыцба – Аҳәынҭқарра-зинтә политиказы аилак алахәҩы.

Аизара ду амш азҵаараҟны иқәгылан Афедерациа ахантәаҩи алахәцәеи ралхра.

Афедерациа ахантәаҩы имаҵурахьы иалхразы иқәгылан Ҳасан Чычба, Левент Аҭрышба, Эрџьаи Паҷкориа.
Аԥсуа культуратә центрқәа рфедерациа Ахантәаҩыс далхуп Левент Аҭрышба.
Иара убас ишьақәыргылоуп Афедерациа Ахеилак аилазаара ҿыц.  

Иахьа Ҭырқәтәыла аус руеит аԥсуа диаспора ахаҭарнакцәа рҽеизакны иахьеиланхо атәыла еиуеиԥшым араионқәа рыҟны иаԥҵоу 22 аԥсуа культуратә центрқәа – адернекьқәа.