Аԥсны Жәлар Реизара - Апарламент Аиҳабы Ашәба Лаша Ахәыҷқәа рыхьчара жәларбжьаратәи амш азы адныҳәалара ҟаиҵеит

Акыр иаԥсоу аҩызцәа!

Иахьа, рашәарамза 1 азы ҳреспубликаҟны адунеи зегьы аҟнеиԥш, Ахәыҷқәа рыхьчара амш азгәарҭоит.  
Аҳәыҷқәа насыԥ рыманы аҟазаара, ршәарҭадара алыршара аҳәынҭқарратә политика ахырхарҭа хадақәа ируакуп. Аҵак дуӡӡа амоуп ҳара ҳзы ахәыҷқәа ргәы бзианы, адыррақәа рыманы, доуҳала ибеианы, Аԥсны Аҳәынҭқарра атәылауаҩра иаԥсаны реиҵааӡара. Инаӡалааит ахәыҷқәа рыгәҭакы лашақәа, ԥхаррала, бзиабарала иҭәызааит иахьрызҳауа аҭаацәарақәа рыҟны зегьы!

Ҳхәыҷқәа ҳрылагәырӷьартә иҟоуп аҵараҟны, арҿиараҟны, аспорт аҟны ирымоу аихьӡарақәа рыла. Иҭабуп ҳәагьы раҳҳәоит ҳреспублика иқәынхо ахәыҷқәа рзы зымч-зылша  иамеигӡо, зԥышәа, здыррақәа рымаздо.

Акыр иаԥсоу ҳхьыбҿар, ахәыҷқәа, ишәзеиӷьаҳшьоит агәабзиара, аҭынчра, насыԥ змоу ахәыҷра лаша аамҭа!