Иахьа Аԥсны Аҳәынҭқарра Апарламент аҟны Жәларбжьаратәии апарламентбжьаратәи еимадарақәеи аџьынџьуаа рымадареи рзы аилаки Абиуџьети, акредиттә еиҿкаарақәеи, ашәахтәқәеи, афинансқәеи рзы аилаки инарҭбаау аилатәара мҩаԥыргеит аҳәынҭқарра асоциал-економикатә ҿиара иазку азҵаарақәа рзы.

Аилатәара иалахәын Апарламент адепутатцәа, аԥыза-министр, афинансқәа рминистр Владимир Делба, уи ихаҭыԥуаҩ Ирма Амҷба, ашәахтәқәеи аизгатәқәеи рзы аминистр Михаил Габелиа,  афымцамчи атранспорти рминистр Џьансыхә Нанба.

Аиԥылараҟны иалацәажәеит Аԥсны Аҳәынҭқарра абиуџьеттә усхк аҟны аус зуа хазы игоу акатегориақәа: агәабзиарахьчара, аҵараиура, аҭҵаарадырра, акультура, аспорт, атәылауаа социалла реиқәыршәараҟны руалафахәы ашьҭыхразы афинансеицаужьра аанкылара инамаданы ҳазҭоу ашықәс азы ареспубликатә биуџьет анагӡара атәы.  

Иара убас адепутатцәа азҵааит ҳазҭало ашықәс азы аҳәынҭқарратә биуџьет ашьақәыргылара атәы.  Афымцамчи атранспорти рминистр инарҭбааны далацәажәеит афымцамчтә усхк аҟны иҟоу ауадаҩрақәеи иқәгылоу ауснагӡатәқәеи.  

Аилатәара иалахәыз инарҵауланы иазааҭгылеит Аԥсны Аҳәынҭқарра Апарламент уи аԥхьа изықәнагоу аусбарҭақәа рышҟа рырҽеиразы идәықәҵаз Аԥсны Аҳәынҭқарра адгьылҵакыраҟны урыстәылатәи аиуристтә хаҿқәа рыла аинвестициатә проектқәа рынагӡаразы Аԥсны Аиҳабыреи Урыстәыла Аиҳабыреи ирыбжьоу аиқәшаҳаҭра инамаданы ажәалагалақәа.  

Аԥсны Аҳәынҭқарра анагӡаратә мчхара ахаҭарнакцәа хыԥхьаӡара рацәала Апарламент адепутатцәа рызҵаарақәа рҭакқәа ҟарҵеит.