Аԥсны Жәлар Реизара – Апарламент Аиҳабы Ашәба Лаша Арҵаҩы имш азы адныҳәалара ҟаиҵеит.

Адныҳәалараҟны иҳәоуп:

«Акыр иаԥсоу аҩызцәа!

Аԥсны Жәлар Реизара – Апарламент ахьӡала ишәыдысныҳәалоит Арҵаҩы имш!

Ари амш аҽны ҳара ҳрыдныҳәалоит аус ду знапы иану – ҿыц игыло абиԥара реиҵааӡара знапы алаку ауаа. Ауаатәҩса аԥхьаҟатәи реихьӡарақәа руасхыр азышьҭаҵахоит ашкол аҿы. Арҵаҩцәа рџьабааи, рбаҩхатәреи, руаҩышәатә ҟазшьақәеи ирыбзоураны аҵаҩцәа адыррақәа, аԥсҭазааратә ԥышәа, изыхәҭоу адгылара роуеит. Ҳара иаҳхашҭӡом, ҳаԥсҭзаара зегьы иҳацуп ашкол аҿы аҵара ҳзырҵоз ҳарҵаҩцәа ргәалашәара, ҳгәы иҭаҵәахны иҳамоуп иҳарҭаз аԥхарра.

Акыр иаԥсоу ҳарҵаҩцәа! Иҭабуп ҳәа шәаҳҳәоит есҽнытәи шәааԥсаразы, шәзанааҭ ахь ишәымоу абзиабаразы, шәҵаҩцәа гәыкала рзыҟазаашьазы, аихьӡара ҿыцқәа ргәы ахьазҭашәҵо азы. шәзеиӷьасшьоит агәабзиара, агәамч, анасыԥ, шәнапы злаку аҭакԥхықәра ду зцу аус аҟны ақәҿиарақәа!"