Аԥсны Аҳәынҭқарра Акоснтитуциатә ӡбарҭа имҩаԥнагоит Аԥсны Аҳәынҭқарра Аконституциа 30 шықәса ахыҵра иазку I  Аԥснытәи азанааҭдырратә мчыбжь.  
Иахьа И. Папасқьыр ихьӡ зху Амилаҭтә библиотека аконференц-зал аҟны ари аусмҩаԥгатә аартра мҩаԥысит.
Аԥсны Жәлар Реизара - Апарламент Ахантәаҩы Ашәба Лаша I  Аԥснытәи азанааҭдырратә мчыбжь алахәцәа Аԥсны Аҳәынҭқарра Аконституциа 30 шықәса ахыҵра рыдиныҳәалеит. Адныҳәалара атекст даԥхьеит Аԥсны Аҳәынҭқарра Апарламент Аппарат Анапхгаҩы Вадим Бжьаниа.

Адныҳәалара атекст:

«Аԥсны Жәлар Реизара – Апарламент ахьӡала I Аԥснытәи азиндырратә мчыбжь иалахәугьы уи аиҿкааҩцәагьы ишәыдысныҳәалоит Аԥсны Аҳәынҭқарра Аконституциа 30 шықәса ахыҵра амш.
Аԥсны Аҳәынҭқарра аҭоурых аҟны 1994 шықәса абҵарамза 26 аҵак ду змоу рыцхәуп. Абри аҽны Аԥсны Аҳәынҭқарра Иреиҳаӡоу Ахеилак адепутатцәа еицҿакны ирыдыркылеит Аԥсны Аҳәынҭқарра Аконституциа, анаҩс уи 1999 шықәсазы Аԥсны жәлар зегьы рыбжьыҭарала иақәшаҳаҭхеит.  
Абри инаркны Аконституциа Аԥсны Аҳәынҭқарра аргылара уасхырс иазышьҭаҵаз политика-зинтә документны иҟалеит.  
Аԥсны Аҳәынҭқарра 30 шықәса рыҩныҵҟала еиуеиԥшым аҿиара аамҭақәа ирҭысит. Аамҭацыԥхьаӡа иара иаҟазшьаз ауснагӡатәқәа цәырнагон. Аамҭа ҿыц иара иашьашәалоу азнеишьа ҿыцқәа аҭахын. Аконституциа ауаажәларраҟаны имҩаԥысуа аиҭакрақәа анымԥшыыр ауӡом. Убарҭ аиҭакрақәа рныԥшит 2014, 2016 шықәсқәа рзы Аԥсны Аҳәынҭқарра Аконституциа иалагалаз арҽеирақәа рыҟны. Убасала, иаԥҵан Аԥсны Аҳәынҭқарра Аконституциатә ӡбарҭа. Иахьа аԥсҭазаара иаҳнарбоит Аԥсны Аҳәынҭқарра Аконституциа иҿыцу, ҳазҭагылоу аамҭа иақәшәо аԥсахрақәа ралагалара аҭахны ишыҟалаз. Иҳәатәуп, Аԥсны Аҳәынҭқарра аҵарауааи азиндырҩцәеи аҳәаанырцәынтәи рколлегацәагьы даргьы ҳаамҭазтәи аԥсуа ҳәынҭқарра аҿиара азҵаарақәа рылацәажәара ишаҿу жәларбжьаратәи аизыҟазаашьақәа ҳасаб рзуны.  
Ҳаҭыр зқәу аҩызцәа, аколлегацәа, аконференциа иалахәу зегьы ишәзеиӷьаҳшьоит лыҵшәа змоу аусеицура, ақәҿиарақәа шәнапы иану аус ду аҟны».