Аԥсны Жәлар Реизара - Апарламент Ахантәаҩы Ашәба Лаша Аԥсны жәлар Аконституциа амш рыдиныҳәалеит.


Ҳаҭыр зқәу Аԥсны жәлар!

Иахьа Аԥсны Аҳәынҭқарра Аконституциа 30 шықәса ахыҵуеит!  

  Аԥсны Аҳәынҭқарра жәлар рхатәҳәаақәҵаратә зин инақәыршәаны, ҭоурыхла ишьақәгылаз, суверентә, демократиатә, зинтә ҳәынҭқарраны ирылазҳәаз Аконституциа рыдыркылеит 1994 шықәса абҵарамза 26 рзы, Владислав Арӡынба напхгара зиҭоз Аҧсны Аҳәынҭқарра Иреиҳаӡоу Ахеилак асессиаҟны. 1999 шықәса жьҭаарамза 3 рзы иахьа аус зуа Аконституциа Аԥсны Аҳәынҭқарра атәылауаа жәларызегьтәи бжьыҭарала иақәшаҳаҭхеит.

       Аҧсны Аҳәынҭқарра Аконституциа ианыԥшуеит аҭоурыхтә традициақәа, хра злоу акультуратә традициақәа, ажәлар ззықәԥо ахықәкы хадақәа – аҩныҵҟатә гәҭынчреи, ауаҩы изинқәеи, ихақәиҭрақәеи, атәылауаҩратә ҭынчреи аҳәоуеиқәшәареи.

Ҳара гәадурала иаҳҳәоит ихьыԥшым аҳәынҭқарра ҳамоуп ҳәа, ҳара ҳзы аҵак ду амоуп ҳԥеиԥш лаша ачаԥаразы алшара ҳазҭо аҭынчреи аҭышәынтәалареи.
  
Абри амш азы ҳаҭырла иаҳгәалаҳаршәоит ҳаԥсадгьыл ахьыԥшымреи ҳажәлар рзинқәеи ирзықәԥоз. Иахьа Аԥсны атәылауаа зегьы неилых ҟамҵакәа ҭакԥхықәраны иҳадуп ҳ-Аԥсадгьыл Аԥсны аԥеиԥш ахьчара, иагьҳаԥхықәуп хымԥада Аԥсны Аҳәынҭқарра Аконституциа  ақәныҟара.  

Иҿиааит, еизҳазыӷьалааит Аԥсны Аҳәынҭқарра!