Аԥсны Жәлар Реизара - Апарламент Ахантәаҩы Ашәба Лаша ԥхынҷкәынмза 14  1992-1993 шш. Аԥсны Аџьынџьтәылатә еибашьраан иҭахаз Ахәыҷқәа рымш аҽны Аԥсны жәлар рахь ааԥхьара ҟаиҵеит.

Ааԥхьараҟны иҳәоуп:

Ҳаҭыр зқәу ҳауаажәлар,

Иахьа лахьеиқәҵарала иаҳгәалаҳаршәоит харада аибашьра иалаӡыз ҳуааԥсыра.  
    Аԥсны Аџьынџьтәылатә еибашьраҟны ихлымӡааху, ахааназы уаҩы игәы иҭнымҵәо мшуп – 1992 шықәса ԥхынҷкәынмза 14 рзы ақырҭуа қәылаҩцәа амацәаз иҭакыз Тҟәарчал иалганы аҳәсеи ахәыҷқәеи аазгоз Лаҭа ахаҿы авертолиот еихсны ианкарыжьыз.
Ари амш даҽазныкгьы иаҳгәаланаршәоит ахақәиҭреи ахьыԥшымреи ирыхҭнаҳҵаз, ҳажәлар ироуыз ацәыӡ дуқәа ртәы.
Хашҭшьа амаӡам ашәымҭак ала зыуацәа, зҭынхацәа зцәыӡыз аҭаацәарақәа зҭагылаз агәаҟра, ироуыз ахьаа. Ҳара зегьы ҳгәалашәараҿы наунагӡа иаанхаз ари ахҭыс бааԥс иҳанаҳәоит уаҵәы игыло абиԥарақәа ас еиԥш арыцҳарақәа ишырцәыхьчатәу.  
  Иага аамҭа царгьы, нҵәара зқәым ахьаа ацзаауеит зегьы ҳзы 1992–1993 ш ш. Аԥсны Аџьынџьтәылатә еибашьраҟны иҭахаз Ахәыҷқәа ргәалашәара амш.