Апарламент Ахантәаҩы Ашәба Лаша Аԥсны жәлар 2025-тәи Ашықәс ҿыц рыдиныҳәалеит.

Адныҳәалараҟны иҳәоуп:

Ҳаҭыр зқәу ҳауаажәлар!

Аԥсны Жәлар Реизара – Апарламент ахьӡала ишәыдысныҳәалоит ҳазҭало Ашықәс ҿыц!

Ҳаԥсҭазааразы аҵак ду змоу ари ахҭыс алшара ҳнаҭоит иҳаҩсуа ашықәс азы аихшьалақәа ҟаҵаны, ҳгәыӷрақәа, ҳагәҭакқәа адаҳҳәалоит  иааиуа аамҭа ҿыц –2025-тәи ашықәс. Ҳазҭысыз ашықәс мариамызт, ҳгәыӷуеит ҳазҭало ашықәс ҳтәыла аҿиаразы аполитикатәи аекономикатәи усхкқәа рыҟны ишьақәгылаз акризис аиааира иашықәсхап ҳәа. Зегьы ҳаидгыланы иҟоу ауадҩарақәа ҳариааироуп ихадараны ҳҿаԥхьа иқәгылоу ахықәкы анагӡаразы – уи Ҳаԥсадгьыл аҿиареи аизҳазыӷьареи ирызкуп.
  
Иааиуа аныҳәамшқәа рзы дасу шәыҩнаҭақәа ирыгымзааит анасыԥ,  абарқьаҭра, ишәзааигәоу ауааи шәареи гәырӷьарыла шәаԥылааит Ашықәс ҿыц.

Ҽаанбзиала, акыр иаԥсоу ҳауаажәлар!