Аԥсуаҭҵааратә институт аҟны имҩаԥысит Аҭоурыхдырҩцәа-кавказҭҵааҩцәа жәларбжьаратәи рфорум  


Аԥсны Жәлар Реизара  – Апарламент Ахантәаҩы Ашәба Лаша XII Аҭоурыхдырҩцәа-кавказҭҵааҩцәа жәларбжьаратәи рфорум  «Кавказ ажәларқәа XVIII–XXI ашәышықәсақәа рзы:аҭоурых, аполитика, акультура» далахәын.
Аԥсны Аџьынџьтәылатә еибашьраҟны Аиааира 80 шықәса ахыҵра, Аԥсны Аҳәынҭқарра Актәи Ахада  Владислав Григори-иԥа Арӡынба 80 шықәса ихыҵра, Д.И. Гәлиа ихьӡ зху Аԥсуаҭҵаара институт 100 шықәыса ахыҵра иазкыз Афорум аартра мҩаԥысит Аԥсны Аҳәынҭқарра Аминистрцәа реилазаара азал ду аҟны.  
  Лаша Ашәба Аԥсны Жәлар Реизара  – Апарламент ахьӡала XII Аҭоурыхдырҩцәа-кавказҭҵааҩцәа жәларбжьаратәи рфорум аартра инамаданы адныҳәалара ҟаиҵеит.
Адныҳәаларатә цҳамҭаҟны иҳәоуп:

«Ҳаҭыр зқәу Афорум иалахәу, асасцәа!
Акыр иаԥсоу Д. И. Гәлиа ихьӡ зху Аԥсуаҭҵааратә институт аусзуҩцәа, аветеранцәа, аҩызцәа!
Аԥсны Жәлар Реизара ахьӡала, хаҭала сара сыхьӡала, азин сышәҭозар, гәык-ԥсык ала ишәыдысныҳәалоит акрызҵазкуа аиубилеи - Аԥсуаҭҵаара институт аԥҵоижьҭеи 100 шықәса аҵра амш.
Ари ахҭыс ду инаваргыланы сынтәа иазгәаҳҭоит егьырҭ ахҭыс дуқәа: Аџьынџьтәылатә еибашьра еилгеижьҭеи 80 шықәса аҵреи, ҳаамҭазтәи Аԥсуа ҳәынҭқарра аԥҵаҩы, Аԥсны Аҳәынҭқарра Актәи Ахада, академик Владислав Григори-иԥа Арӡынба диижьҭеи 80 шықәса аҵра арыцхә.
Абас еиԥш асимволтә ҵакы змоу Аԥсны Аҳәынҭқарразы илахьынҵаӡбагоу арыцхәқәа реиқәшәара машәырны иҟамлаӡеит. Уи иаҳнарбоит аҭоурыхи, аҭҵаарадырреи, аҳәынҭқарратә ргылареи еиҟәыҭхашьа шрымам, ишеимадоу.
Ари ашәышықәса аҩныҵҟа Аинститут ҳажәлар рҭоурыхи ркультуратә коди еиқәырханы иаанагоит. Еиҳа ианыуадаҩыз аамҭақәа рызгьы ара  еиԥҟьарада аусура мҩаԥысуан ҳбызшәа,  ҳатрадициақәа, ҳетногенез, ҳҭоурых аҭҵаареи аиқәырхареи. Ари аусура Аԥсны аԥеиԥш ачаԥара иазкын.
Аааԥсара ззымдыруаз аинститут аусзуҩцәа русумҭақәа аҭҵаарадырра иазышьҭарҵаз аусхыр ӷәӷәа аԥхьаҟа аихаҳара рылшеит ҳмилаҭтә интеллигенциа. Абри аусхыр ауп шьаҭас иаиуызгьы аԥсуа милаҭ рыҟазааразы азинқәа рыхьчареи ихьыԥшым аҳәынҭқарра аргылареи рус.
Машәырны иҟамлаӡеит абра, абри аҭҵаарадырратә центр аҟны изызҳаз, ишьақәгылаз аҵарауаҩ Владислав Арӡынба ҳҳәынҭқарра аԥызҵаз архитектор иаҳасабала дахьгылаз.
Иахьа Аԥсуаҭҵаара институт 100 шықәса раԥхьеиԥш, академиатә усбарҭа мацараны иҟаӡам. Уи ҳмилаҭ иргәадуроу, доуҳатә баагәараны, хьӡи-ԥшеи згым ҳтоурыхи ҳԥеиԥш лашеи еимаздо цҳаны иҟоуп.
Акыр иаԥсоу аҩызцәа!
Аинститут аусзуҩцәа зегьы гәык-ԥсык ала ишәыдысныҳәалоит агәабзиара, еицакра змам арҿиаратә гәамч, аҭҵаарадырратә еихьӡара дуқәа. Иҟалааит шәара шәааԥсара аԥхьаҟагьы Аԥсны Аҳәынҭқарра аизҳара, асуверенитет арӷәӷәара, ҳмилаҭ рдоуҳа аиҭаҿиара алзыршо лагаламҭаны.
Даҽазныкгьы ишәыдысныҳәалоит Аԥсуаҭҵааратә институт аиубилеитә шықәсхыҵра!»