Аԥсны Жәлар Реизара - Апарламент Ахантәаҩы Ашәба Лаша Аконституциа Амш азы адныҳәалара ҟаиҵеит:

" Акыр иаԥсоу ҳауаажәлар!  Аԥсны Жәлар Реизара - Апарламент ахьӡала ишәыдысныҳәалоит Аԥсны Аҳәынҭқарра Аконституциа Амш!
Ари амш ҳтәыла аҭоурых аҟны аҵак дуӡӡа змоу адаҟьақәа ируакуп. Уи иаҳгәаланаршәоит ҳҳәынҭқарра ашьаҭаркра ахыҵхырҭаҟны игылаз, ҳаҭырла ахьӡ ҳҳәоит 1994 шықәса абҵарамза 26 рзы Аԥсны Аҳәынҭқарра Аконституциа здызкылаз Аԥсны Аҳәынҭқарра Иреиҳаӡоу Асовет. Ахә ашьара уадаҩуп Аконституциа азырхиареи адкылареи рус аҟны Владислав Григори-иԥа Арӡынба ироль.
Аконституциала аԥсуа жәлар ахьыԥшымреи, асуверенитети, ахақәиҭреи рзы ирымаз ргәазыҳәара нагӡаан, уи иахьатәи аамҭеи ҳԥеиԥши рыргылара ауасхыр азышьҭанаҵеит.  1999 шықәса жьҭаарамза 3 рзы Жәларызегьтәи ареферендум ажәлар зегьы еицҿакны рақәшаҳаҭхарала Аԥсны Аҳәынҭқарра Аконституциа аднакылеит.  .
Арҭ ашықәсқәа рыҩныҵҟала Азакәан Хада амчлша шьақәнарӷәӷәеит. Ҳара агәра ҳгоит азакәанԥҵара аԥҵареи аиӷьтәреи рымҩала амчра амахәҭақәа зегьи ауаажәларратә еиҿкаарақәеи русеицура иабзоураны аҳәынҭқарра аԥхьаҟагьы арӷәӷәара, Аԥсны Аҳәынҭқарра ҭышәынтәаланы аҿиара шалшо".