Аԥсны Жәлар Реизара - Апарламент Ахантәаҩы Ашәба Лаша аиԥылара мҩаԥигеит Ҭырқәтәыла иҟоу аҧсуа культуратә центрқәа еидызкыло Аԥсуа Федерациа анапхгаҩ ҿыц Иауыз Аҭрышба зхадараҟны дыҟаз аделегациа алархәны.
Аиԥылара иалахәын Жәлар Реизара Ахантәаҩы ихаҭыҧуаҩ Аҩӡба Фазлыбеи, Ҭырқәтәылатәи Ареспублика аҟны иҟоу Аԥсны Ахаҭарнак Ибраҳим Аҩӡба.
Аиԥылара аартуа, Ашәба Лаша Аԥсуа Федерациа ахантәаҩы Иауз Аҭрышба Афедерациа Анапхгаҩы имаҵзурахьы иалхра идиныҳәалеит.
Ашәба Лаша иазгәеиҭеит Иауыз Аҭрышба Аԥсны Аџьынџьтәылатә еибашьраҟны илагала, иҳәеит Афедерациа анапхгара ҿыц иабзоураны аԥхьаҟа ҳдиаспора рҭоурыхтә ԥсадгьыли дареи реимадара еиҳагьы иӷәӷәахоит ҳәа агәаанагара шимоу.
Иауз Аҭрышба иҭабуп ҳәа ахиҳәааит аԥхарра зҵаз аиԥылара, иазгәеиҭеит аԥсуа жәлар рԥеиԥш лашазы аусеицзура ишазыхиоу.
Аиԥылара иалахәыз азааҭгылеит иара убас Аԥсны аҩныҵҟатәи, адәныҟатәи аполитика иадҳәалоу актуалра злоу азҵаарақәа, иара убас Ҭырқәтәыла инхо аԥсуа диаспора рҭоурыхтә ԥсадгьыли дареи реизыҟазаашьақәа рырҿиара аҧеиҧш.