Аԥсны-урыстәылатәи аҳәааҟны Аԥсны Жәлар Реизара – Апарламент Аиҳабы Ашәба Лаша Алада Уаԥстәыла аделегациа ахада Алан Гаглоев зхадараҿы дыҟоу аделегациа дырԥылеит. Иара убас аделегациа ирԥылеит Апарламент адепутатцәа Шергелиа Ҭемыр, Беииа Ҭемыр, Ԥлиа Бадрик, Галуст Трапизониан, аиустициа аминистр Барцыц Анри, аҳәынҭқарратә ҳазалхратә еилакы ахантәаҩы ихаҭыԥуаҩ Гогохиа Анана, Аԥсны Жәлар Реизара Аппарат анапхгаҩы Бжьаниа Вадим.
Аделегациа Аԥсны иаҭааит Жәларбжьаратәи аекономикатә форум «Аԥсны – аԥеиԥш аинвестициақәа ралагара» алахәхаразы.
Аделегациа аилазаараҿы иҟоуп – Аиҳабыра Ахантәаҩы Ӡамболат Тадтаев, Аиҳабыра Ахантәаҩы ихаҭыԥуаҩ Сармат Котаев, Ахада Иадминистрациа Анапхгаҩы актәи ихаҭыԥуаҩ Сармат Чочиев, Алада Уаԥстәыла Аиҳабыра алахәцәеи Апарламент адепутатцәеи.

Афорум Аԥсны Аҳәынҭқарра Ахада иаԥшьгарала имҩаԥысуеит мшаԥымза 2 инаркны 4-нӡа.
Ахықәкы хадақәа – атәыла аинвестициатә лшара аарԥшра, адәныҟатәи апартниорцәеи ҳареи ҳусуратә еимадарақәа рырӷәӷәара, аусутә ҳауа аиӷьтәразы иалкаау амеханизмқәа аус рыдулара, аекономикахь ишиашоу иаауа аинвестициақәа реизҳара ацхраара. Ҷыдала ахшыҩзышьҭра аҭоуп ақыҭақәеи агроааглыхратә комплекси рыҿиара.
Апрограмма иеиднакылоит апленартә еилатәарақәа аартра аҽни аихшьалақәа рыҟаҵареи раан, иара убас Аԥсны асоциал-економикатә ҿиара ахырхарҭа хадақәа ирызку аишәа гьежьқәа фба:
· «Аинвестициатә усура адгылара аҭараҿы аҳәынҭқарра иааннакыло аҭыԥ»;
· «Ақыҭанхамҩа аҿиара»;
· «Атуризм аекономика аҿиара адраивер аҳасабала»;
· «Аҳаиреимадара аҿиара аԥеиԥши атранспорттә инфраструктура аекономика аҿиара ианаҭо анырреи»;
· "Аӡахәааӡареи аҩыҟаҵареи атрадициақәеи рыҿиара аиамоу аԥеиԥши»;
· «Акреативтә индустриақәа ҳаамҭазтәи аекономика иарҭо анырра».