Аԥсны Апарламент аделегациа Москва имҩаԥысуаз Атеррористаҿагыларатә форум иалахәын
2026 шықәса лаҵарамза 23 – 27 рзы Москва имҩаԥысуеит апрогрессивтә, армарахьтә–патриоттә мчқәа Жәларбжьаратәи атеррористҿагыларатә форум.
Аԥсны Жәлар Реизара аделегациа аилазаараҿы афорум аусура иалахәын адепутат Ҳалуашь Беслан, Апарламент Аппарат анапхгаҩы Бжьаниа Вадим.
Афорум ааиртит УА Акоммунисттә партиа Ацентртә комитет ахантәаҩы Геннади Зиуганов.
Аусмҩаԥгатә иалахәуп 80 инареиҳаны атәылақәа рхаҭарнакцәа, апартиақәеи ауаажәларратә еиҿкаарақәеи рхаҭарнакцәа, аполитикатәи ауаажәларратәи усзуҩцәа, апарламентарицәа, аҵарауаа, аветеранцәа, азанааҭеидгылатә, аҳәса, аҿартә еиҿкаарақәа рхаҭарнакцәа.
Аԥсны Аҳәынҭқарра акоммунистцәа афорум аҿы хаҭарнакра рзыруан Аԥсны Аҳәынҭқарра Акоммунисттә партиа ахантәаҩы Бебиа Бакур Апарламент адепутат Ҳалуашь Беслани.
Афорум аҳәаақәа ирҭагӡаны аԥснытәи аделегациа «Жәларбжьаратәи атерроризми, ахаԥышәареи, агрессиеи ирҿагыланы ақәԥара. Аҭынчреи ашәарҭадареи рзы» жәларбжьаратәи аконференциа иалахәын.