Аԥсны Жәлар Реизара – Апарламент Ахантәаҩы Ашәба Лаша Аԥсны Аҳәынҭқарратә ҳазалхратә еилакы аԥҵоуижьҭеи 35 шықәса аҵра инамаданы ахантәаҩи аусзуҩцәеи дрыдныҳәалеит.

Адныҳәалараҟны иҳәоуп:

«Аԥсны Жәлар Реизара – Апарламент ахьӡала ишәыдысныҳәалоит Аԥсны Аҳәынҭқарратә ҳазалхратә маҵзура аԥҵоижьҭеи аиубилеитә шықәсҵра!
1991 шықәса цәыббрамза 27 рзы иаԥҵаз Аԥснытәи ареспубликатә ҳазалхырҭа аҳәынҭқарра аекономикатә интересқәа рыхьчара алыршара иазкын. Иҳаҩсыз ашықәсқәа рыҩныҵҟала ареспубликаҿы аусура ду мҩаԥгоуп аҳәынҭқарра аҳазалхратә усбарҭақәа рышьақәгылареи, азакәанԥҵаратә база азырхиареи аиӷьтәреи, аҳазалхратә ус аҟны аҳәынҭқарратә политика анагӡареи рзы.
Ҳара ахә ҳаракны иаҳшьоит 1992-1993 шш. Аԥсны Аџьынџьтәылатә еибашьреи аҳазалхратә усбарҭақәеи рветеранцәа шәара ишәыдгыланы аус зуа, зԥышәа аспециалистцәа ҿарацәа ирымаздо аҳәынҭқарра аҿаԥхьа рылшамҭақәа.
       Шәара амилаҭтә интересқәа рыхьчара алшәыршоит, закәаншьаҭада атауарқәа ралагалареи ралгареи рзы аҽазышәарақәа аԥырҟәҟәаауа, акультуратә беиарақәа рыхьчара ацхраарала, ареспублика абиуџьет ахашәалахәытә хәҭа ахарҭәаарала.
Иахьа аԥснытәи аҳазалхратә усбарҭақәа ҳаамҭазтәи атехнологиақәа ахархәара рызҭо, аекономикатә ԥсҭазаара алахәцәа рҭахрақәа ҳасаб рзызуа, Урыстәылатәи Афедерациеи Аԥсны Аҳәынҭқарраеи рыбжьара аусеицура қәҿиарала арҿиара иадгыло еилазаашьоуп.
Аҳазалхратә усбарҭақәа рыҟны аус руеит зыпрофессионализм ҳараку, азанааҭтә ҭакԥхықәра аныҟәгара зылшо аусзуҩцәа. Шәара шәеиқәшәаны шәусеицура акыр аҳәынҭқарра аизҳазыӷьара, аинвестициатә ҭагылазаашьа аиӷьтәра иацхраауеит.
       Аԥсны Аҳәынҭқарра аҳазалхратә еилакы аколлектив иазеиӷьасшьоит аусураҿы ақәҿиарақәа, аҳазалхратә маҵзура аусзуҩцәеи аветеранцәеи – агәабзиара, агәамч, аихьӡарақәа».