Аԥсны Жәлар Реизара – Апарламент Ахантәаҩы Ашәба Лаша Аԥсны жәлар Аиааиреи Ахьыԥшымреи рымш рыдиныҳәалеит.

Адныҳәалараҟны иҳәоуп:

«Ҳаҭыр зқәу ҳауаажәлар! Ҳаҭыр зқәу 1992-1993 шш. Аԥсны Аџьынџьтәылатә еибашьра аветеранцәа !
Аԥсны Жәлар Реизара – Апарламент ахьӡала ишәыдысныҳәалоит Аԥсны Аҳәынҭқарра Аиааиреи Ахьыԥшымреи рымш!


Ари аныҳәа - адоуҳатә акзаара, ахьӡ-аԥша, афырхаҵара, агәымшәара,   зныԥшуа ныҳәоуп. 1993 шықәса цәыббрамза 30 рзы Аԥсуа ар Қырҭтәыла ар ԥыххаа иқәҵаны, Аԥсны Аҳәынҭқарра аҵакырадгьыл зегьы аӷа иҟынтә ахы иақәиҭыртәит.  

Аӷа иқәцара зыбзоуроу ҳаибашьцәа, Аиааира аагаразы зхы иамеигӡаз зегьы рлагаламҭа иамоу аҭоурыхтә ҵакы аамҭа цацыԥхьаӡа есааира иазҳауеит. Афырхацәа иаадырԥшыз агәымшәара ҿырԥшык аҳасабала аҵак ду амоуп ихьыԥшым ҳҳәынҭқарразы.

Иҭахаз афырхацәа ҳаҭырла иаҳгәалаҳаршәоит, ҳҳырхәоит аветеранцәа зегьы рҿаԥхьа. Иалкааны иҭабуп ҳәа раҳҳәоит аибашьра иацыз агәаҟрақәа ҳацеиҩышаны, иаҳа ианыуадаҩыз аамҭазы иҳадгылаз хатәгәаԥхарала еибашьуаз ҳашьцәа. Урҭ иаадырԥшыз афырхаҵара ду Ҳиааира ашықәсынҵа иануп, аԥхьаҟатәи абиԥарақәа рзы иҿырԥшыгахеит.

Иахьа ҳара ихьыԥшым, исуверентәу аҳәынҭқарра ҳаргылоит, уи ашьаҭақәа рырӷәӷәара иазкуп иҿио ҳекономика, ҳтәылауаа рыԥсҭазаашьа аҩаӡара аизҳара,   еиқәҳархо ҳкультуратә ҭынха Ҳаҭырла иаҳгәалаҳаршәоит ԥхьаҟа ацаразы ҳазну амҩа  зхы ақәҵаны иаҳзылызхыз.

Аԥсны Аҳәынҭқарра аизҳазыӷьара алзыршо акәны иҟоуп хаҭала дарбанзаалак илагала, уи ауп шьаҭас иаиуагьы аӡәк иеиԥш ҳаидгыланы иаҳчаԥо ҳԥеиԥш.

Акыр иаԥсоу аҩызцәа! Ныҳәа дууп зегьы ҳзы ари амш! Ишәзеиӷьасшьоит агәабзиара, анасыԥ, ахирра.
Иҟазааит ҳадгьыл аҿы наунагӡа аҭынчра, аизҳара, аҿиара!»