Аԥсны Жәлар Реизара – Апарламент адепутатцәа зыԥсҭазаара иалҵыз Апполон Алмасхан-иԥа Гәыргәлиа иуацәеи иҭынхацәеи гәалсра дула ирыдышшылоит.

Ҳколлега – Аԥсны Жәлар Реизара – Апарламент V ааԥхьара (2012-2017) адепутат Апполон Алмасхан-иԥа Гәыргәлиа иԥсҭазаара зегьы Аԥсны жәлар рымаҵ аура иазкын. Иара аҳақьым ибаҩхатәра ҷыда змаз, ахирургиа аганахьала иазхаҵаз специалист дуун, аԥсра иацәигахьаз зықьҩыла атәылауаа рыԥсҭазааразы ҳаҭырла иҭабуп ҳәа иарҳәоит.

Идырра ҵаулақәеи, иусуреи, ихамеигӡареи акыр шықәсала амедицина амаҵ аура иазкын. 1992-1993 шш. Аԥсны Аџьынџьтәылатә еибашьра раԥхьатәи амшқәа инадыркны   ахирург, анестезиолог, ихәыз аибашьцәеи атәылауааи ацхыраара рызҭоз, афронт иаԥну ахәышәтәырҭақәа еиҿызкаауаз, А. А. Гәыргәлиа иааирԥшыз агәымшәареи афырхаҵареи рзы ианашьоуп Аԥсны Аҳәынҭқарра иреиҳаӡоу аҳамҭа – «Аԥсны Афырхаҵа» ҳәа ахьӡ.

Апполон Алмасхан-иԥа Гәыргәлиа ҳтәыла агәабзиарахьчара аҿиараҿы илагала дууп Аԥсны Аҳәынҭқарра агәабзиарахьчара аминистрс, Очамчыратәи Ахәштәырҭа хада  аҳақьым хадас, Аԥсны Атәылахьчара аминистрра Арратә хәышәтәырҭа аиҳабы ихаҭыԥуаҩыс, Ареспубликатә хәышәтәырҭа аҳақьым хадас иусура аамҭа аҩныҵҟала.  Еицырдыруа аԥсуа хирург, Аԥсны зҽаԥсазтәыз аҳақьым, иколлегацәа-амедикцәа хәы змаӡам иԥышәа рымеидон.

А.А. Гәыргәлиа иџьабааи ибаҩхатәра аган ҿыцқәеи аныԥшит иара убас аҳәынҭқарратә аԥсуа бызшәа алшарақәа рырҭбааразы иусумҭа ду. 2026 шықәсазы иҭыҵит 20 нызқь инареиҳаны атерминқәа еидызкылаз ҩ-томкны иҟоу «Амедицинатә терминқәа рзы аурыс-алатин-аԥсуа жәар». Аԥсны Аҭҵаарадыррақәа Ракадемиа апрезидиум А.А. Гәыргәлиа иусумҭа ахә ҳаракны иашьеит. Уи «Аԥсны аҭҵаарадыррақәа ракадемиа ҳаҭыр зқәу адоктор» ҳәа ахьӡ иҵоуп.

Адепутат иаҳасабала иусураан Апполон Алмасхан - иԥа Гәыргәлиа изанааҭтә ԥышәа ихы иаирхәон асоциалтә политикеи, аџьеи, агәабзиарахьчареи рзы Аԥсны Жәлар Реизара –Апарламент Аилак ахантәаҩыс даныҟаз. Еиуеиԥшым аусхкқәа рҿы Апполон Алмасхан-иԥа игәаартра, иааирԥшуаз агәцаракра, зҿлымҳара зиҭоз аусхкқәа рымҽхак аҭбаара, идыррақәа аҳаҭырқәҵара даԥсаны дҟарҵеит.  

Аԥсны Жәлар Реизара – Апарламент Жәларбжьаратәи, апарламентбжьаратәи еимадарақәеи ҳџьынџьуаа рымадареи рзы Аилак алахәҩы иаҳасабала А.А. Гәыргәлиа апарламентбжьаратә усеицуреи жәларбжьаратәи аимадарақәеи рырӷәӷәараҿы илагалмҭа дууп. Уи дрылахәын Аԥсны Аҳәынҭқарраҟныеиԥш, уи анҭыҵгьы имҩаԥысуаз еиуеиԥшым жәларбжьаратәи аиԥыларақәа. Апполон Гәыргәлиа Аԥсны Аҳәынҭқарреи, Алада Уаԥстәыла Ареспубликеи, Приднестровиатәи Молдавиатәи Ареспубликеи ртәылауаа асоциалтә цхыраара рыҭара азҵаарақәа, агуманитартә усхк аҟны аҭагылазаашьа анализ азура, адепутатцәа русеицуразы ауснагӡатәқәа рыхәаԥшра иазкыз асоциалтә политиказы «Адемократиеи ажәларқәа рзинқәеи рзы» Аидгылара иалахәу Аҳәынҭқаррақәа Рпарламентбжьаратә Ассамблеиа акомиссиа аилазаара далан.

Апполон Алмасхан-иԥа Гәыргәлиа Аԥсны Аҳәынҭқарра аҭоурых дахәҭакхеит. Уи иԥсҭазаара иалҵра ҳара зегьы цәыӡ дуны иҳадаҳкылеит.

Апполон Алмасхан-иԥа ҳгәалашәараҿы дынхоит ауаҩра злаз, апатриот иаша, аспециалист ду иаҳасабала.